【台語日常】劉靜娟／我欽佩演員

我愛看關係各種職業的連續劇。律師、法官、檢察官、醫生、護理師、明星經紀人、電影音效導演、替皇帝記錄每日大細事的史官、藝伎、攑重輪的選手、總鋪師、大公司的菜鳥等等，in的生活和故事真好看——當然，編劇愛有相當的才情；In的養成過程也予觀眾學著一寡智識。

看愈濟，我愈欽佩演員。大部分演員攏演啥像啥，有彼個範。法律的台詞遐爾（註一）濟、遐爾專業，演律師、法官的也攏講甲足紲拍（註二）。敢講逐家攏有本事共背起來？

《非常律師禹英禑》演自閉症的朴恩斌講伊無像禹英禑遐爾天才，背法律條文誠困難。「拍這齣劇的第一個課題就是熟似台詞；法律條文毋是讀一兩遍就會當理解，但是做演員就是愛有耐性，後來我就親像應付考試按呢，共逐日的台詞寫佇A4紙頂，逐日暗念。七個月的時間，我攏若咧考試。」

醫療劇的外科醫生也真厲害，《浪漫醫生金師傅》、《機智醫生生活》攏是真濟人愛看的劇。我毋知專業醫生的看法啥款，不過，阮攏感覺in開刀的手路真老練，親像真正的、醫術一粒一的醫生，講醫療術語也予外行的觀眾聽甲耳仔覆覆。有一個序細講看醫療劇，就足想欲去做外科醫生（可惜傷慢矣）。

影劇會當假，事前事後加工；但是，會當做甲遮爾（註三）自然，嘛是可見in的智慧。

莫講主角，足濟大大細細的配角，少年的、老的，嘛攏演甲真合伊的角色和劇情。欲笑，欲哭，欲表現怨妒、苛薄、奸詐、拗蠻、陰鴆……嘛袂離譜。

毋知遐濟演員是對佗位揣（註四）來的？我臆，小跤數的臨時演員趁的錢可能無夠維持基本生活，所以一定有別項頭路；必要的時，影劇公司才共in叫叫來。是毋是像古早時代按呢，逐家本底攏是做田的，山賊侵入庄矣，聽著拍鑼拍鼓抑是拍鼎的聲，才忽然間變做兵卒仔，攑鋤頭、棍仔、鐮刀出來相戰？

註：1. 遐爾（hiah-nī）：那麼

2. 紲拍（suà-phah）：利落

3. 遮爾（tsiah-nī）：這麼

4. 揣（tshuē）：找